Oroscopo, come vignerghene fora da 16 al 22 marso

Ariete: No xe sempre domenega e le bone stee de la scorsa stimana le xe gà spostà, ma gavì sempre el cueo dala vostra e i xe sfigà solo luni e marti. L'unica roba xe la vostra solita prepotensa che ve rende gradevoli come un brufolo in tel naso quando gavì n'apuntamento d'ammmor. Ste chieti se no ve da un cartelin rosso come a Ibra. 

Toro: Metive i ociai da soe che gavì i oci a forma de cuore come in un manga: gavemo capio che sì inamorà e amai ma magari i single i xe indispetise e i ghe resta mae. I porchi che gavì tirà in sti mesi podaria eser servii a trovar la strada giusta: a volte bestemare paga, desso basta però. 

Gemelli: Come sempre a sì indecisi su tuto, lavoro e amor xe rebus, l'unica roba su cui sì sicuri i xe i schei, che guai a tocarveli. Xe ora de darve na mossa però: le question va risolte desso, massimo in aprie. No ste domandar parchè: xe cussì e basta. 

Cancro: Benon, podì tirar fora el vestio dea festa e fare i fighi pal mondo. Finalmente i cojoni ga smesso de girar come la roulette e podì rilasarve. Magari ciamè qualchedun ca gavì insultà in ste stimane buie e ofrighe no spritz. Ndando fora, podarisi anca imbatterve in qualche bona ocasion. 

Leone: A fasì fastidio da quanto ve va ben, solo un poco de stanchessa, ma, se sa, el cambio de stagion xe cussì. A ve va talmente de lusso, ca podì anca pensar de cambiar moros*, se sì stufi. Dopo, però, tegnive in forma par scapar da chi piantè...

Vergine: Altro che 50 sfumature, voialtri volì provarne millemila! Dovì aver n'atimo de pasiensa, aprile e poi agosto xe i momenti giusti, e soprattutto star pronti a pagar qualcosetta. Chi lassa la via vecia par la nova, magari ben xe trova ma magari xe perde par strada. Se capitasse, no vi sarì desmentegà na bossa de quel bon par farvela pasare. 

Bilancia: Se no i ve ga molà fin desso a sì salvi. No se sa se xe un ben o no, ma così xe. Pal resto, sì rigidi come un bacalà dei ani '80. Cassi vostri, le robe e cambia e voialtri dovì farvene na rason. 

Scorpione: Sì neri come i cavei de Noaro, ma gavì anca rason. Sì fortunà che i morosi ve se stà visin fin desso, chisà parchè poi. Se volì farli contenti, fè qualcoseta de novo: magari butè chee ciabate spussone de Germania 2006. 

Sagittario: Sì divertenti come la musichetta mentre spetè l'operator del telefono par tre ore ma almanco tra i linsoi fasì faville. Sempre che gavì qualchedun che ve soporta. Se no lo gavì, andè in palestra: ne gavì bisogno e magari a conosì qualchedun. 

Capricorno: Corajo che le stele scominsia ad acorgerse anche de voialtri. sarà sta par tuti i rosari blasfemi ca gavì tirà. Ovviamente, el vostro mejo lo dasì al lavoro, con la grasia del bensinaio de Nanto. Se volì anca dar qualche botta prima che riva l'inverno dei sensi, però, gavì da dir do paroe ogni tanto. "Ciò, come steto?" xe sa un inissio. 

Acquario: "Stua e reimpissa". La regoa fondamentae de l'informatica xe parfetta par voialtri. La sfiga ve sta picicà sù come l'Attak in tei dei, ma gavì da farvene na rason. Sostituì l'acqua col vin e 'nde vanti. A pie, me racomando. 

Pesci: Come i vostri amici gemej, gavì grosi problemi in tel prender decision. Gavì roto e scatoe: anca voialtri deve na mossa, massimo entro aprie. Coi morosi, se no va ben, o giustè le robe e nde' fora dae bae. Barufare ogni dì fa mae al fegato pì dela graspa.