Oroscopo: come vignerghine fora dal 28 setembre al 4 otobre
L'autuno xe definitivamente rivao e con tute le sagre e le feste ca ghe xe, lo strologo no ga mia vudo massa tempo par scrivere. Sto giro, però, xe sta puntuae in te a consegna... gavarà fato un dirtto
Ariete: No gavì mia na bea stimana. A ve incasinè co ninte e le persone ca ve sta intorno no e ve iuta: mejo se i lassè perdare e ve fasì i afari vostri. Ghe xe da dire ca gavì comunque un certo fassino e el weekend podaria darve dele bele sorprese.
Toro: Ninte poe fermarve ma ocio ala paleta dei vigili o dei carabinieri: lì ve convien farlo. Gavì talmente fortuna sta stimana ca no ve farà gnanca mesa multa. L'unica roba xe ca podarisi avere qualche rognetta coi morosi: assè perdare e feve un giro al bar.
Gemelli: No se spiegà, ma sì de bon umore e tuti quanti i xe contenti così ve iuta anca volentieri. Ve sarà qualche imprevisto, sta stimana, ma fe finta de ninte e tuto 'ndarà ben. Coi morosi, invesse, va mia masa ben, ma ste chieti ca tuto xe risolve.
Cancro: Sta stimana xe mejo starve distante. Le robe no va mia massa ben e voialtri no si drio tor le robe con filofia e le fasì andare anca peso. Deme reta, deve na calmada se no in tel weekend no ve restarà altro che star da soi a vardar la tv.
Leone: A sì tornà in auge, dopo qualche stimana poco poco sfigà. Sia coi amici che coi morosi sì irresistibile e tuti ve voe ben. Anche quela persone ca ve piase tanto, ma se sì sposà no ste fare i birichini. Xe na stimana bona anca pai schei quindi no stasì far i tacagni e un goto ofrilo!
Vergine: Come sempre a ve dè un gran da fare e le stee dise ca riva anca i risultati stavolta. Soprtauto in tel sgobo, qualsiasi sia la vostra atività, el primo gradin del podio no veo cava nisun. Ocio a no cascar zò e no ste dismentegarve dei morosi: anca luri i ve speta...
Bilancia: Anca sa ve fa strano, la sarà la stimana bona par andar d'acordo coi parenti. Oviamanete no mancarà lo scassacojoni ma voialtri no ste mia darghe reta. Magari la sarà invidia, visto ca xe in vista una conquista amorosa...
Scorpione: Deme reta, moeghea de eser cusì scontrosi e zerchè de eser n'atimin pì dolsi. Anca parchè no sarà mia na stimana massa bea in tel sgobo e gavarì bisogno de qualche dun ca ve consola, ma se mandè tuti in ciupese, no ve resterà che el barista!
Sagittario: Podarisi avere qualche problema coi morosi e la colpa la xe vostra. Gavì un po' trascurà i doveri coniugai e podarisi trovarve a dormire in tel divano. Deve da fare, ca le stee dise ca farì faville e tutti i malumori i scomparirà.
Capricorno: Par voialtri esere imusonà se la norma, ma sto giro a sì drio esagerare. Gavì l'espresività de mister Marino durante le conferensa stampa ma, sicome voialtri no sì mia l'alenatore del Vicensa, la gente podaria anca stufarse. Deme reta: fasì sù la valigia e feve un gireto, magari a qualche sagra.
Acquario: La sarà na stimana duretta coi morosi. Le stee le xe dispetose e le farà de tuto par farve barufare ma voialtri no ste darghe reta e zerchè de star chieti. Se gavì in programa un viagio, ocio al paco, ca potraria eser dietro l'angolo.
Pesci: A barufè anca co a vostra ombra, sto giro, e starve visin xe come star in meso a un branco de meduse. Xe colpa vostra solo in parte, parchè le robe no va mia massa ben, ma almanco zerchè de avisare parenti e amici ca ve stia distante.
