Oroscopo vicentino della settimana dal 31 otobre al 6 novembre

SPECIALE OROSCOPO DE ALUIN (PAR LUNI)

Ariete: No ghe xe storie, sta stimana la xe la vostra. Unica roba: sicuri che sì drio fisarve co a persona giusta? O germa magari fruto de na sbornia finia ben? Dai, fora i cojoni e n'dè vanti, chi no ve voe no ve merita. 

Toro: Oh, ma sì na sfiga continua! Anca sto giro no ve ne va una giusta, ma xe colpa vostra parchè se sbajè na volta no xe mia colpa vostra, ma se 'ndè vanti sì mona. Tignì duro, da la stimana prosima dovaria ndar mejo e forse torna anca l'ammor. Tanto i corni li gavì de vostro. 

Gemelli: Moeghea de far capricci o i ve manda in ciupese! Savemo che gavì bisogno de farve notar e de eser al centro de l'atension, non par gnente sì dò, ma sì drio tirar mato el moroso o la morosa. E no ste badar massa a chi ve provoca: come el diseva el Sommo, "vardè e andè oltre"

Cancro: A sì dei bei tipi, savio? Vardè che, se i ve da rasòn, xe par farghe tasere no parchè la gavì. "La rasòn se da ai mati", stampeveo in te na felpa, come fa qualche politicante. Ghe xe da dire, però, che quando volì sì talmente dolsi che fè ingrasar solo a vardarve, quindi deghe dentro in camporea, che il tempo xe beo.

Leone: Sò dal leto, ca il mondo xe vostro. Peteneve la criniera e ndè fora in te la iungla: xe il momento giusto par i vostri progeti. Ocio a no magnar masa gaselle o tignì graspa sotoman.

Vergine: A ve sì ciapà n'atimo indrio, sgoboni e precisini come sì, ma San Valentin xe rivà anca par voaltri. Sentì la primavera e podì tirar fora dala cantina i morosi, sempre ca i sia ancora vivi.

Bilancia: Noialtri ve lo gavinino dito: dee volte l'unica solusion xe un bel "Ma copate". Finalmente ne gavì dato reta e qualcosetta dovaria 'ndar mejo. Sù, forsa e corajo che se no la procesion se ingruma. 

Scorpione: Metivela via, fin l'istà de vialtri le stee no vole saverghine. Ansi, ghe ste anca un pocheto sule bale. In particolar le done ga da darse da calmada. Ocio se gavì amiche scoprione col porto d'armi. 

Sagittario: Ghe xe na ressa de pianeti in tel vostro segno e, se no ve ne sì acorti, vol dir che xe la volta bona. Moeghea de pincionare su fesbuk e deve da fare. Magari no vardar solo in tel bar soto casa: fasì la valigia e via a far disatri. Poi brindè ala nostra salute.

Capricorno: Nì. Come sempre a sì un fiatin scarcabarile, no va ben. Se le robe no e gira xe anca colpa vostra, sì onesti e no ste ciaparvea col gato. Se anca la va giusta, ve sentì soto presion: l'importante xe ca non rompì i maroni a tuti.

Acquario: Se no ve sì copà la stimana scorsa, va ben: tignì duro ca tanto peso de cusì no poe 'ndare. Almanco serchè de tirarve sù col moroso, sempre che nol ve gabia sà mandà a tirar su finferli. 

Pesci: Nuotè in acque chete, caraibiche quasi. Quindi, no ste perderve drio ae monade e valutè ben dee proposte che ve se rivà. Par qualchedun podaria anche eserghe fiori d'arancio in vista. Invitene al pranso.