Oroscopo vicentino dal 16 al 21 de agosto
Feragosto, se sà xe sempre pien de feste e festini ma lo strologo, ca xe bastian contrario, xe rimasto casa a vardarse le olimpiadi in tv. Par fortuna ga trovà el tempo de far l'oroscopo...
Ariete: No se capise mia ben parchè, ma par voialtri la sarà mia na bea stimana. No xe ca ve capita qualcosa de particolare, tipo vien trovarve el cusin vegano e dovì cusinarghe par na stimana, ma proprio no a ve gira. Provè a concentrarve su queo ca volì...
Toro: Tuto tranquio e podì goderve la fin dee ferie, se le gavì fate, o comunque star chieti in relax. La roba mejo ca podì fare xe star n'atimin ci morosi parchè in sti giorni de festa magari ve sì dedicà de pì ai fusti... de bira.
Gemelli: Stimana chieta e, come sempre, voialtri dovì sempre pensare a dodesemia progeti... assè stare e buteve in tel divano a non pensar a ninte. Xe la roba mejo e ogni tanto ghe voe. Magari verseve na bireta e vardeve l'inissio del campionato
Cancro: A no podì certo lamentarve de come ca xe andà sti istà. Ve si divertii, in tei limiti del posibie, gavì magnà, bevù e gavì anca pincià. Cossa volì de piu?! Ma le stee ga deciso che anca sto giro la ve va ben quindi... cin!
Leone: Hm, mia massa ben sta stimana. A sì incassà e quando voialtri a sì cusì xe mejo starve distante. Però saria mejo se ve de na calmada e scominsiè a capire cosa che nol va, sensa dar colpe a chi ca no c'entra ninte.
Vergine: A sì sempre i soliti. A sì talmente ciapà dae robe da fare quando ca tornè casa o al sgobo ca si drio rovinarve i ultimi giorni de ferie. No, ah! Anca parchè gavì anca gente intorno e no xe giusto romperghe e baee. Dai, ca la spesa la fasì dopo, ndè torve na pissa al tajo!
Bilancia: Ma vara ti ca stimana stramba. Un po' sì, un po' no, no se capisse. In tel dubio, voialtri ste chieti e feve i cassi vostri ca no se mai sbajà. Non se sa mai chi ca ghe xe in giro e cosa ca vole. E, come sempre, prima de parlar tasì.
Scorpione: Visto el periodo ca gavì pasà fin deso, disemo ca no poe che n'dar mejo! E in efetti xe cusì: pasà la buriana, desso scominsiè a vadra le robe co n'atimin de otimismo e ve vien anca idee bone. Un consiglio: no ste aver freta, se sì in ferie riposeve e tignive le idee par dopo...
Sagittario: Ah bhe, sto giro gavì vinto el titolo de Candy Candy de la stimana. A sarì tuti dedicà ai sentimenti e all'ammore che parfin i Modà ve sembrerà un grupo Heavy Metal. Bon par voialtri, ancha parchè se vignù el fresco e in te leto sudè de manco.
Capricorno: Ben dai, dopo mesi e mesi de disastro e depersion, se sa che a voialtri primavera e istà ve mete sconforto, desso, con i temporai e l'autuno in vista a scominsiè a viver de novo. Anca coi morosi va ben ma forne na sorpresa ca ve farà no ve la andarà proprio a genio. Deme reta, fè un soriso e divertive istesso.
Acquario: Viva la libertà, xe dise. E xe proprio il caso vostro. Sta stimana a sarì spensierà e sereni, ca sarisi boni anca de divertirve anca a un concerto de contrabasso solista. Magari fasì altro, comunque el sarà un bel periodo sereno e feice.
Pesci: Ghe xe baruffa in te l'aria, come la diseva na vecia reclame. Bhe, el me consijo xe de star chieti e de no far mia i squai che non convien mai. Se proprio gavì i rompibae intorno, zerchè de farve i cassi vostri. Xe sempre la roba mejo.
