Oroscopo vicentino della settimana dal 25 al 31

Ariete: Forse dovarisi renderve conto che i anni pasa: el vecio telefonin va benisimo ma se tuti i usa uotsapp sì tajà fora. Xe ora de dedicarse n'atimin ad agiornarse, vedì voialtri dove ca xe pì urgente. De bon ghe xe che el fine stimana podaria riservarve bee sorprese.

Toro: Godivea finchè la dura, parchè el uikend no ndarà massa ben. In compenso, la stimana la sarà fulgida e piena de bee robe. L'unico problema xe ca no basta andar a Sotomarina, dovarisi andar oltreoceano. Magari contenteve de na bira giasà americana, ca la va sempre ben. 

Gemelli: El vostro bracin corto ve premia: quando ca versarè l'estrato conto dea banca no credarè ai vostri oci. Del resto xe mesi ca ve fasì ofrir da bere anca dal toso ca domanda monetine fora dal supermercato. Ocio però ca sì un fiatin nervosetti ma el fine stimana pasa tuto. 

Cancro: A sì lucidi e grintosi come Cocco sotoporta e dovè ciaparghe drento. Atension ai soliti scasa-cojoni: tigneve ala larga se no la va a fir mae. Se gavì morosi, organisè na bea gita pal fine stimana, se no a farè vegnere el sgranfo da quanto romantici ca sì. Se sì single, podari anca trovar bona compagnia.

Leone: Xe decisamente el periodo vostro. Se gavevi dubbi, i se ga sciolti come el giaso in teo spriss quando ca xe caldo e desso podì veramente far queo ca volì. Invese che rimirarve in tel specio (ca non sì gnanca sto gran che), vardeve intorno: ghe xe qualche dun ca ve fa i oci dolsi...

Vergine: Ghe xe pì de qualchedun ca ve rompe i maroni, ma voialtri gavì massa da fare e quasi gnanca ve ne acorsarè. Sarà na stimana de lavoro a pieno regime e con boni risultati. Scolteme, però: in tel uikend riposeve e tirè fora i morosi dal frigo...

Bilancia: In sto periodo gavì scantonà un poco massa e desso saria el momento giusto de andar vanti coe robe. Xe inutie ca ve lamentè ca no gavì ninte da meterve se no stirè da Natale...Darve na mossa ve portarà anca a eser n'atimin pì disponibie con chi ve voe ben, ca a sì sta un po' distratti in sti giorni

Scorpione: Mejo starve distante, sta stimana, se no spunciè e no xe gnanca el caso de lavorar co voialtri, ca sì drio fare un poco massa casìn. Coi morosi no va mi mejo, ve consijo de "tasere prima de parlare", se no volì trovarve single. 

Sagittario: El caldo no ve tange, anzi. A sì drio ndar vanti come na schegia e no ghe xe ostacoli ca tegna, sia in tel lavoro che in tel ammor. I problemi, magari, i li gà i morosi vostri, parchè ve sentì n'atimo birichini e le tentasiòn ve circonda. No ste farghe lesere sto oroscopo...

Capricorno: Va na s-cianta mejo de le ultime stimane, ma no ste iluderve. Se le stee xe anca bone, a xe el vostro caratere ca rovina tuto. A sì pì gelosi de un sicilian e no ghe xe rasòn. Ste chieti, par carità, ca gavì anca torto: podaria rivare na telefonata de quell'ex...

Acquario: Tignì bota e spetè le ferie. Sarà na stimana fastidiosa e no solo par le zanzare. Problmi ghi n'è e voialtri sì strachi e stressà. Le solusion le xe do: o fe finta de ninte o mandè tuto in ciupese e partì par el Mesico. 

Pesci: A sì drio fare un saco de casìn e chi ca ve sta intorno no capisse pì ninte. Bravi a sì bravi ma la gente ve varda come se fussi u mutante. Il uikend, invesse, el va ala grande, ocio a no spender massa.