Oroscopo vicentino dela stimana dal 23 al 29 majo
Tra i festegiamenti par la fine del campionato e l'isolasion a Sotomarina, el strologo se ga ciapà a vardar le stee con 40° de febre. Valutè voialtri se xe el caso de darghe reta o manco...
Ariete: La sarà na bona stimana par sgobo e afari; se ve spetè na promossion i xe i giorni guisti. Anaca la salute la va ben e coi morosi e la fameja a ve d'acorodo con tuti. Le stee dise che i single ga da ciaparghe dentro in tei primi giorni... no ste far i pigri!
Toro: A sì un fiatin massa mona in sti giorni: mejo se lassè stare le tratative con chi xe pì svejo de voialtri o ve la ciparè in quel posto. Mejo dedicarse ale robe solite, ca le va ben, e spetare l'ultima stimana de majo, quando ghe sarà grosse novità
Gemelli: Fursi, ma fursi, a sarì boni de far manco casin del solito. Le robe le ve par pì ciare e a sarì boni (finalmente) de tor na decision. La roba mejo saria de far le valigie e partire: da n'altra parte ve spetta bee sorprese...
Cancro: La situasion la xe un fiatin incasinà, va dito, ma vedarè che sta stimana a sarì boni de trovare el bandolo dea matassa. Par colpa dea Luna (disighe cussì ad amici e morosi) a gavarì giornate alterne, un fià imusonà, un fià contenti. El weekend el sarà solo el preludio de queo che ves spettarà dopo...
Leone: Ndè farve la mesa in piega e prepareve par vestire ben: la xe na stimana de fogo. La gente ve stima e se sì in cerca de cuori da rubar (disemo cussì) xe el momento giusto... A sì anca in forma e fasì la vostra porca figura anca in palestra. Ocio però a no far massa lo sborone...
Vergine: Hmmm. a sì acidi ca metà basta. Cerchè de darve na calmada prima che i capi o i morosi ve manda in mona. Cerchè de essere un fiatin pì sensibili e, inveze de tirar su question, anticipè queo che i altri i voe da voialtri e tuto el andarà mejo.
Bilancia: Alora, disemo ca par quei creativi la va ben, quei pì pratici e tecnici xe mejo ca i sta fermi se no i fa disastri. Coi morosi, sia i uni che i altri mejo che i lassa perdere: no xe proprio la stimana giusta par l'ammmor. Ste chieti che in tel fine stimana la andarà un fiatin mejeto...
Scorpione: Metive le mudande bone ca xe el momento giusto. A sì sensuali e seducenti e tuti i ve casca ai piè, quindi laveve anche quei. La ginastica no la sarà solo tra i lensoi: xe anca el momento giusto par fare sport. Organisè na bea gita par domenega.
Sagittario: Alora, parlè solo se interrogai e, se se poe, fasive i cavoli vostri pì che podì: no xe proprio la stimana giusta, par voialtri, par relassionarse col genere umano e non. A sarisi boni de barufare anca col vostro amato gateo. La situassion la andarà migliorando ma ocio la domenega...
Capricorno: Sta stimana a sì imbattibili. In tel sgobo nisun xe ala vostra altessa e i lo sa, la fameja ve stima e anca i morosi i xe contenti de star con voialtri. Se gavì robe da cambiare, sia in tel lavoro sia in ammor xe el momento giusto: el vostro inuito nol ve tradirà. Fasive corajo e CIN!
Acquario: Marria santa a sì ciapà coi ormoni ca metà basta! Mejo se lasse perdere i impegni grossi in te sgobo e fasì el minimo inspensabile parchè xe el momento de pensare all'ammor. Ocio a no indugiar massa in tei lensoi ca ghe xe anca do tre scadense da portar a termine
Pesci: Come xe dise, idee poche e confuse, vero? E quee poche me sa che le xe anca sbaja. L'unica roba da fare sta stimana, par voialtri, xe de star fermi parchè qualsiasi cosa ca fasì el xe un danno. Porte pasiensa e spetè domenega.
