Oroscopo vicentino dela stimana dal 16 al 22 majo
El tempo el fa el mato ma el nostro strologo de pì. Pensè che sto fine stimana xe ndà al mare coa piova e col fredo. Come chel gabia fato a vardar le stee con tuto queo chel gà tambarà lo sa solo lù
Ariete: A sarà na stimana de giudissio, ca par voialtri xe na roba rara, e ne gustarè i risultati. Vedarè ca stendere i calsiti paro par paro ve evitarà de girare co un calsin viola e uno beje. Ben coi morosi, anca i single i gavarà le sue, e ben anca coi amici. Weekend sereno (el vostro, queo meteo bisogna domandare a Marco Rabito)
Toro: L'amore el trionfa sempre: a sì melensi ca fasì fastidio ma a voialtri no ve ciava gran che, quindi vanti coe romanticherie. Al lavoro va ben, anca se i morosi i ve faria rivare sempre in ritardo. Insoma, el periodo bon continua... Ocio a no eser massa gelosi ca no ghe xe motivo.
Gemelli: Finalmente ve la va drita, va là. Le robe le scominsia a girar ben e i rompicojoni probabilmente i ga trovà altro da fare. Ben in tel sgobo, sopratuto pai professionisti, e quindi la sera dedicheve ai morosi o ale conquiste, chi ca xe single. No esser massa birichini e... CIN!
Cancro: Sta stimana pai schei la va benissimo, e dispasere nol fa, grassie a certe persone ca gavevi perso de vista e che desso le xe de novo nei paraggi. Oviamente, par catarli gavì da 'ndar fora dal leto... Xe anca el momento de far nove amicissie: le stee dise ca a sì simpatici e podarisi incontrar qualchedun de bon, sopratuto in tel weekend
Leone: Gavì le valige pronte? Se no, fasile. Le stee dise ca nel vostro futuro imediato (desso!) che xe un viajo al'estero: sgobo o vacansa? No lo dise, ma fasive trovare pronti. Xe anca le momento de concederse qualche sfizio e/o vizietto... Feme savere, ca son curioso.
Vergine: No ste agitarve massa coi morosi o coi coleghi, se no no i ve capisse mia. O sì ciari o xe mejo se ve fasì i cassi vostri. Magari concedive un pocheto de relax, ca na gavì bisogno: no xe ancora reato, par el momento. No ste dimenticarve la compagnia...
Bilancia: Marria santa, a sì un fiatin nervosetti? Lassè casa el kalashnikov o la clava e deve na calmada, ca xe pì utile. Pitosto libereve dei rompicojoni e cerchè de fare atività fisica, ca la prova costume se avaicina, anca se con ste temperature xeri tranquili.
Scorpione: A ve sentì come Gekko de Wall Street ma nol xe el caso, se no sì gnanca boni de capire l'estrato conto. Lassè stare el business e cerchè, pitosto, de placare la situasion in fameja, ca xe bolente
Sagittario: Hmmm. No la xe mia la vostra stimana. Mejo se fasì le valigie e ndè da qualche parte o, se no podì, deve par malà e ste in leto. Baruffe su baruffe e discusion su discusion ca no le portarà da nesuna parte. Lassè perdare.
Capricorno: Anca sa sì musoni, xe rivà el momento de dedicarse ale amicissia, anca parchè, stranamente, a sì simpatici e socievoli. No ste spaventarve, nol xe na malatia. Ghe xe qualcosa ca ve preocupa, forse l'amor? Lassè stare e rilasseve: xe gratis.
Acquario: Nol xe el momento giusto par dedicarse ale robe de lavoro, anca parchè no scoltè nisuni e questo nol va mia ben. Mejo se ve deichè ai amici e sopratuto ai morosi: el weekend sarà de fogo.
Pesci: A sì pronti pae sorprese? Anca se Pasqua la xe zà pasà, le stee ga deciso de scombussolarve un pocheto le robe, in bon! Par qualchedun ghe xe un amore improvviso, par qualchedun altro un novo lavoro o una promossion... Ocio a no far casade, quindi! Weekend stellare...
