Oroscopo vicentino dea stimana dal 29 marso al 3 aprie

Ariete: Xe el momento ideale par dedicarse ala fameja e ai amici. A sì de luna bona e stasì ben al'aria aperta, sempre ca no sì alergici. Coi morosi la va ben ma ocio a no eser masa gelosi... no ghe xe motivo! CIN

Toro: Ve convien goderve i primi giorni dela stimana parchè dopo le robe le 'ndarà mia massa ben e ve convien programare un fine stimana de relax, magari coi morosi, se ve soporta. Lassè perdare el jogging, scominsirè a meterve in forma la stimana prosima

Gemelli: A sì nervosetti ca metà basta e xe difisie soportarve. Se gavì morosi, ocio a no farve mandare in mona, se sì sposà ris-ciè de eser butà fora de casa, se sì single sareve in casa, ca xe mejo. Portè pasiensa, la prosima stimana la 'ndarà mejo. 

Cancro: Voialtri sì ca sentì la Primavera! A sì romantici e ve piasaria pasare tuto el tempo a far l'amor. sarà par questo ca sì un fiatin distrati e podarisi combinar qualche casin in tel lavoro. Ste tenti. 

Leone: La sarà na bona stimana, sopratuto par le publiche relasion, anca quee manco publiche... Se ghe xe qualchedun ca ve piase, xe el momento giusto par sfogiare el vostro fassino... Peteneve

Vergine: No la scominsia mia in tel mijore dei modi: a sì nervosi e basta una qualsiasi roba par farve saltar la mosca al naso. Deve na calmada se no ve manda in mona tuti e ve tocarà pasare el fine stimana da soi...

Bilancia: A sì carini e gentili e la zente intorno ve ringrassia, anca la fameja e i morosi. Ga vì esagerà a Pasqua e a Pasquetta! Metive a dieta se no no ve ban pì ben ninte par sta Primavera

Scorpione: Cossa gavio ca sì cusì difidenti?! Le stee, e non solo, ve voe ben e sì solo voialtri ca ve sarè sù massa! Dai, ca xe Primavera anca par voialtri: versì el core e godive l'ammor

Sagittario: A sì pronti par le emossioni forti? La sarà na stimana memorabile, da tuti i punti de vista, ma ste tenti a no farve travolgere massa dai eventi. Se sì single, podaria eserghe n'aventura very hot...

Capricorno: Tanto par cambiare a sì determinà verso l'obietivo e sta stimana ghe sarà dei progresi importanti. A sì un fiatin massa contrà in tel sgobo, però, e i morosi no xe mia contenti

Acquario: A sì sereni e se vede. La zente intorno se giova de sta vostra condision e quindi a sarì circondà da gente: zerchè de no spusare, anca parchè i morosi i sente la Primavera... Ocio a no esser massa birichini

Pesci: Wow, a sì in forma da far invidia! Finalmente certe rognette le va a posto e podì dedicarve all'ammor, ca el sarà particolarmente intenso. Ste tenti a no far massa i spiritosi con chi xe pì in alto: nol ghe piase el humor...