rotate-mobile
Sabato, 2 Luglio 2022
Cronaca

Oroscopo della settimana: come vignerghine fora dal 16 al 22 novembre

Col caligo ca ghe giera le stee se ga mia viste ma el strologo xe riusio lo steso a tirar fora le prevision par la stimana. Come chel gabia fato no se sa...

Ariete: La stimana la scominsia che pegio no se poe ma zerchè de no copar nisun parchè dopo la va mejo. Dovaria rivare anca schei e podarì spenderli tuti in palestra, ca xe el momento de 'ndarghe.

Toro: In tel sgobo sta stimana dasì la pista a tuti. Metive soto ca el momento xe bon par guadagnare e, con Natale, che riva, i schei i fa comodo. La Luna ve da un certo fassino e xe el momento de far conquiste. Ocio ale provocasion, no ste rovinar tuto par el vostro caraterin.

Gemelli: Semo nervosetti? Deve na calmada parchè no ve soporta nisun sta stimana, a sì permalosi che no se poe dirve ninte, invese a farisi ben a scoltare. Le robe le ndarà un fiatin mejo da metà stimana in poi, se no ve copa prima...

Cancro: Metimola cusì: mejo se sta stimana ve dedichè al sgobo, parchè coi morosi, parenti e amici a sarì insoportabile. Magari a sì un fiatin stanchi dee solite robe: fave un gireto

Leone: A sì un fiatin insicuri, strano par voialtri ca de soito ve sentì i re de tuto. Par nutrir la vostra autostima ve consijo de dedicarve ale conquiste (ma solo se sì single...) parchè la zente ve casca ai piè... ma magari a xe par l'alito pesante

Vergine: Ghe xe qualchedun ca ve voe metare i bastoni tra le rue ma no ve conosse mia: a superarè i ostacoli con classe e podarisi anca far girar la testa a pì de qualchedun. Anca coi morosi la va alla grande

Bilancia: Xe in arrivo una grande passion, de quee da film, ma ocio ale fasili ilusioni o a sbajar persona: non ste farve abbagliare, me racomando. Pal resto gavì un mucio de robe da fare ma ve riesse tuto ben.

Scorpione: El consijo xe de ciaparghe dentro parchè dala setimana prosima podaria rivare alcune sfighette. Metive de impegno e zerchè de sarare tute le question ca podì, sia in tel sgobo che a casa, e profità anca par divertirve, sopratuto a tola...

Sagittario: Ahi ahi, ghe xe qualcosa che non va coi morosi e/o coniugi: a ve fè do bae tante e se ve parlè xe na baruffa. Deve na calmada e 'ndè farve un giro al bar pitosto ca spunciarve. Ben in tel lavoro ma ocio a quelchedun ca xe invidioso.

Capricorno: Sta stimana sarì in forma: voialtri ve svejè fora col fredo, se sa. Quind, deghe dentro sia al sgobo (ma queo lo fasì sempre), sia coi morosi: i sarà giorni del pasion ardente... WOW

Acquario: La Luna ve mete le ali ai piè. I problemini no i manca ma voialatri a sarì boni de superar tuto con nonchalance e gavarì anca qualche bea sorpresa. Quando xe sta l'ultima volta ca sì andà dal paruchiere o da l'estetista? Nemo, ca xe ora. 

Pesci: La sarà na stimana n'attimin fastidiosa. Gavì na lista de robe da fare ca non finisse pì e la zente intorno no ve da na man. Le stee sugerise de vardarve intorno ca i alleati no i manca...

Sullo stesso argomento

In Evidenza

Potrebbe interessarti

Oroscopo della settimana: come vignerghine fora dal 16 al 22 novembre

VicenzaToday è in caricamento