Oroscopo: come vignerghine fora dal 29 febraro al 6 marso
Anno bisesto, anno funesto? Anca no, depende... Lo strologo xe drio festegiare anca el capodanno More Veneto, no lo ferma gnanca la tempesta, ma el xe riusio anca stavolta a consegnarne el responso dele stele
Ariete: Marso el scominsia ben: sarì astuti e lucidi (se no bevì massa). GHe sarà bone oportunità in tel sgobo e podarì anca farve novi amici. No ste desmentegarve dei morosi, perchè xe previsti bei exploit (xe lese "expluà") tra i linsoi.
Toro: Xe el momento de goderse un poca de stabilità, ma ocio a non farve incantare da proposte massa bee: la fregadura xe drio l'angolo. Par le coppie va mia massa ben, ghe xe baruffe in vista, ma i single i farà s-ciantisi coe nove conquiste. Deve da fare.
Gemelli: A sarì frizzanti come un proseco de quei boni, sia in tel sgobo che in tee relasion. Quei impegnà i ga da star tenti parchè le tentasion xe tante ma qualchedun podaria far la spia se si massa birichini. In tel weekend podaria concertizzarse qualche obietivo...
Cancro: La sarà na stimana al top in tel sgobo. Ispirè fiducia, come un Amarone de quei boni, e a sarì in cima ala lista dei preferii dei capi: podaria rivare qualche proposta interesante. Ben coi morosi e ben anca i single, ca gavarà pì del qualche ocasion
Leone: Nervosetti ah?! Aver a che fare con voialtri sta stimana no xe mia salutare, quindi, se no volì far dani, sareve sù da qualche parte. E mejo xe parchè va mae in tuti i cantoni, dal sgobo ai morosi, ai amici. dasime reta: sparì pa un poco...
Vergine: Oviamente el lavoro el va ala grande, del resto voialtri sì sempre i secioni. Sta stimana podarisi anca incontrare qualchedun de importante: vestive ben. Par quei ca xe strachi del solito tran tran de copia, podaria esere el momento giusto
Bilancia: A sì gritosi e determinadi ca metà basta, sopratuto al sgobo. Ciapeghe dentro parchè le robe podaria andar anca mejo del mejo. Ben anca coi morosi e ci amici a sì sereni. Godive el tempo libero, ca negavì poco.
Scorpione: Se sì' dirio zerca lavoro la zè la stimana giusta: ghe xe na persona importante da incontrare e podarisi presetnarghe i bei progeti ca sì drio preparare da tempo. No ste sbajare. Asè stare gli invidiosi e i lamentosi e tirè vanti.
Sagittario: Ste chieti, par carità, ca se no fasì dani ca metà basta. Se ve comportè ben la stimana no la sarà mia mae: al sgobo xe previste bee sodisfasion e anca coi morosi la va ben e i single podarà divertirse. Quindi, no isterie!
Capricorno: Hm, xe ora de comprarse qualcoseta de novo, ca girè coe robe coi busi, n'altro poco. A sì sempre drio lavorare e ve cure poco: se vede! Ciapeve do ore de ferie e ndè a far shopping, par carità. Anca parchè el weekend sarà focoso...
Acquario: Bei, fortunà e creativi. La sarà la stimana ideale par voialtri, cari. Quindi deve na sistemada e 'ndè fora, ca le stee ga un saco de robe beissime in serbo par voialtri. CIN
Pesci: Vardeve le spale, ca non gavì mia massa amici intorno e ghe xe anca un poca de sfiga. Capita, no panico. Ste chieti e zerchè de far le robe modeo base, magari la va anca drita. E anca tra i linsoi... mejo dormire.
