Ariete: Ste tenti ai busiari e tigneve le robe vostre par voialtri. Se me de reta, la sarà na stimana fulgida, sopratuto in tel sgobo. gavarì tempo ed energia anca par chi savì voialtri e podarì convecderve anca un poco de shopping. CIN!

Toro: A sarì concreti e decisi e rivarè dove ca ve xeri prefisà. Le decision le riva fasii e veloci, sia in tel sgobo che tra i linsoi (no massa veloci però..). Xe el momento giusto par inisiar qualcosa de novo, sopratuto nei primi giorni de la stimana.

Gemelli: A sarì nervosetti e poco simpatici, sopratuto con chi ve sta pì visin. Zerchè de darve na calmada o de farve un giro se no ris-ciè de barufare fisso. Coi morosi e co la fameja no la va mejo... Sareve sù da qualche parte fino a Pasqua, quando le robe le ndarà mejo

Cancro: Ghe sarà qualche problemin ma se no ve agitè andarà tuto ben e sarì boni de vignerghine fora anca con qualcosa in te a scarsea. Versò metà stimana ghe sarà qualche incomprension ma Pasqua la andarà alla grande.

Leone: Xe el momento giusto par fare boni afari, dopo le ciavade ca gavì ciapà. In tel sgobo la va bastansa ben e saria anca el momento de concederse qualche momento de relax da dedicare alla belessa

Vergine: No ve sentì tranquili ma, se vardè ben, no ghe xe un vero motivo: gavì solo paturnie. Mejo se girè pagina ma no ste imbarcarve in aventure strane: xe mia periodo e la sfiga la xe drio l'angolo

Bilancia: Sta stimana a sarì al centro de l'atension e ve la cavarè ala grande coi amici e anca coi morosi. Xe el momento de progetar na bea vacansetta romantica o, se no podì, fasì na pasegiata soto gli alberi in fiore...

Scorpione: No xe el momento giusto par scoccar frecce: no ciaparisi el bersajo gnanca da 10 centimetri. Mejo dedicarse ale robe de routine e i risultati i rivarà e podarì anca concederve qualche bea pausetta relax

Sagittario: Sta stimana gavarì un cueo ca metà basta, sopratuto in tel sgobo podaria rivare na bea notissia. Coi amici la va a gonfie vele e se prospetta un saco de robe divertenti, ocio a no fare massa festa. Coi morosi, invese, lassè stare...

Capricorno: Fortunà al zugo e anca in amore, sto giro! Xe el momento de fare boni afari e le ocasion no mancarà. I single gavarà ottime possibilità de bater ciodo e le coppie le sarà in lune de miele tuta la stimana

Acquario: Gavarì tantissime bee idee e ghe sarà anca qualchedun che ve scolta, parfin in fameja: strano! Xe el momento giusto par sistemar quee robette no le xe andà massa ben in tee ultime stimane. El weekend festoni da paura

Pesci: A sì un fiatin stresà e gavì anca rason. Mejo no ciapar decision o prendere inissiative perchè le sarà sbajà. No ste gnanca vardarve intorno, parchè xe pien de rompibae... Asse stare e portè pasiensa.