Ariete: Disemo pure che la sarà na stimana de mer**, inutie scondervelo. Baruffe tuti i dì, anca coi morosi, ca ve pianta il muso e voialtri no xe ca ve impegnè par cavargheo. Anca al sgobo la va mia mejo e gavarè qualche malanno de stagion. Mejo farsela pasare 'ndando fora coi amici.

Toro: Sta stimana le stee dise ca riva schei, ma no ste fidarve massa: spetè de avergheli in man prima de darve allo sciopping compulsivo e lassar ciodi in giro. Anca parchè podarisi avere qualche rogna co la machina e i mecanici i costa. Molto ben coi morosi.

Gemelli: Ve do un cosiglio: se non volì barufare con l'universo intiero, cerchè de star chieti e de mostrarve disponibili. Anca coi morosi, parchè sto giro ris-ciè ca i ve manda in ciupese, ca no podì sempre fare come ca volì. Mejo in tel uikend

Cancro: Sarà na stimana bona par far nove amicisie e, forse, anca qualcoseta de pì. Ben anca in tel sgobo, parchè podaria arivare qualche bona ocasion par fare affari, e anca coi morosi a fasì s-ciantisi. Ben!

Leone: Marria santa, sto giro a sì cativi ca metà basta. Zerchè de no rugir massa se no fè scapare tuti e star soli no ve piase. In più, dopo zobia, le stee dise ca ve spetta bee serate de passion tra i lensoi, quindi... ste boni!

Vergine: In tel lavoro a sì bravissimi, anca pì del soito, e va ben anca in fameja, tanto che podaria anche esserghe un novo arivo... Novità anca in tel campo dele amicissie e dei divertimenti. Xe la vostra stimana, deghe dentro (anca coi morosi). 

Bilancia: Ve lo digo subito: sarà mia na bona stimana, quindi armeve de pasiesa e de imprecasion. Ghe xe anca qualchedun ca xe drio tramare ale vostre spalle, ste tenti. In comenso, dopo i primi giorni, arivarà qualche bea serata coi amici.

Scorpione: Dai, ca le robe le va bastansa ben. In tel sgobo trovarè novi aleati e anca fora farì nove amicissie simpatiche. Ocio ai giorni in tel meso de la stimana, quando gavarì qualche barufa, ma poi in tel uikend torna tuto beissimo. 

Sagittario: Ocio ca ghe xe gente ca ve parla drio, sopratuto in tel sgobo. No ste far mosse strambe e portè pasiensa e anca prudensa, anca parchè dopo mercore le robe le 'ndarà mejo. Quindi, un bel soriso, anca falso, e 'ndè vanti. 

Capricorno: Ghe xe novità in vista e riva anca schei. Le robe le va ben in tel lavoro e anca coi morosi, ca se dimostra carini e inamorai. A sarì sereni e pronti a dar na man ai amici e ai coleghi. Ben!

Acquario: Che casìn! La sarà na stimana de fogo, mi veo digo. A sì massa agità e così incasinè tuto ancora pì de quel che za xe. Baruffe a non finire in fameja, coi morosi e anca al sgobo. Mi ve consijo de darve malai e sararve sù in camera fino ala stimana prossima. 

Pesci: Molto ben sopratuto in tel sgobo, dove tirè fora la vostra indole da squali, altro che pessetti! Ciapeghe dentro parchè la seconda parte de la stimana no la sarà mia granchè, sopratuto in casa. Mejo se scivolè via muti...