rotate-mobile
Cronaca

Oroscopo, come vignerghene fora dal 23 al 29 marso

L'arivo della Primavera, segnà come sempre dal maltempo, ga mandà in depresion il 'strologo ca se gà rifugià in tea caneva de so nono. Gà detà cosa che dise le stee a lù, ca xe anca sordo

Ariete: Se non usè il lanciafiamme par impisarve na cica va tuto ben. Voialtri tendì sempre ad esagerare, quando ca sì in forma ma ste tenti ca nel far la rivolusion no ve trovè sensa i calsiti de ricambio parchè ghe butà via anca quei. Zobia e venare podarisi aver qualche pensiero: dai, che dopo riva el uikend. 

Toro: No ghe semo. El lavoro ve fa tribolare e gavì sa speso la paga de aprie, diventè da meno generosi coi giri al bar, almanco finché e robe no e se giusta. Almanco cucchè come un tronista, ma no domenega, quindì podì tornare a bevare coi amici.

Gemelli: Ah benon, par voialtri sta stimana no ghe xe storie: tuto ve va ben e podì far crepar de invidia coleghi e single. Voialtri, infatti, sarì sempre in bona compagnia. Ciapeghe dentro e, se gavì qualche rognetta da risolvere, fasilo deso.

Cancro: No ghe semo, prepareve. Dovì portar pasiensa in sta stimana e no deprimarve, che le stee ve ga preparà un bel 2015, ma no par sti giorni. Coi morosi, invese, la va ben. Consoleve con queo. 

Leone: No sì al top, come la stimana scorsa, ma sì comunque frissanti come un bel prosecchin. Godivea e no ste romper massa i maroni co le question de coppia: magari xe ora de darve na petenada ala criniera e de andar altrove.

Vergine: A ve rovinè le giornate a forsa de pensare ai schei. Dè reta, no xe il momento, gavì da aspetar la fine de aprie. Quindi metivea via e godive qualche spriss. In ammor ghe xe qualche gratacapo ma no ste andar in depresion. 

Bilancia: Basta rimugiar! Queo che gavì fato xe sta giusto, anca se gavì usà la grassia de un panson imbriago, e desso dovì aspetar che le robe le se evolva. Tignì la testa alta: equilibrà come ca sì xe il momento de decider voialtri se ordinar un rosso o un bianco. Anca el rosè va ben. 

Scorpione: Cerchè la colla e scominsiè a riatacarve i tocheti. Xe sta duretta e, se non ve svejè fora, podaria 'ndar anca peso. Deve na mossa e ocio a no incolarve i dei. 

Sagittario: Ostriche e champagne par voialtri sta stimana. Mejo de cussì no pol 'ndarve e gavì anca conossudo qualchedun ca ve piase. Deghe dentro

Capricorno: Orco can, zà sì pessimisti de vostro e le stee de sicuro no ve iuta, parchè le robe le mijorerà solo dopo l'istà (no ste ciparvea co' mi). A sì anca fortunà che qualcun ve soporta: godiveo e deghe dentro col lavoro, no coi goti. 

Acquario: A sì incasinà pegio del me armaro, dove no se trova ninte e queo ca se trova xe da stirar. La colpa la xe vostra, sì massa imboresà e non ve acorsì ca fe star mae chi ve se visin. Ocio a non becarve no stramuson

Pesci: Pì che dei pessi parì orche assasine: deve na calmada parchè sì drio fare un casin ca metà basta. Se gavì debiti al bar, pagheli, se no i ve vien a sercare col forcon
 

Sullo stesso argomento

In Evidenza

Potrebbe interessarti

Oroscopo, come vignerghene fora dal 23 al 29 marso

VicenzaToday è in caricamento