Oroscopo vicentino della settimana dal 9 al 16 otobre

Ariete: Sarà n'inisio de stimana no massa bon, ansi, teribie se dovì fare qualcosa de novo. mejo se lassè perdare (disighe ai capi ca lo go scrito mi) e ca spetè el fine stimana, quando ca l'andarà decisamente mejo. Se gavì i morosi consoleve con quei, ca alamnco par de lì no xe previsti disastri

Toro: Alora, gavì un mocio de roba da fare, xe vero, ma ve la caverè ala grande, se no strafè. Fasì el vostro, disemo, e tuto andarà ben. Ocio a chi ve xe visin: podarisi avere qualche baruffa parchè a sì un fiatin permalosi. Deve na calmada e, se proprio dovì, xe el momento giusto par pianficar qualcosa de serio coi morosi.

Gemelli: Ah, marria santa, sto giro xe na barufa drio che l'altra con chiunque ca ve capita a tiro, ma anca da distante. Ghe ze da dire ca invese le robe de lavoro le va ben e quindi xe mejo se ve dedichè a queo, almanco tirè su schei e podì ofrire ai amici

Cancro: Se gavì in mente robe grosse (no el sedere), xe il momento par darve da fare, sopratuto da mercore in poi. Prima, mejo star chieti parchè chi che gavì introno no ve da mia na man. Pasiensa. Ah, pai single xe ora de agire. 

Leone: Ve ricordè quei schei ca gavì prestà e no ve xe tornà indrio? Forse, ma no ste fidarve dei oroscopi, xe rivà el momento de rivederli. pal resto la va bastansa ben, sopratuto par quei birichini che i ga na relasion segreta. Ocio parò, parchè se volì ca na roba no la se sapia xe mejo no farla...

Vergine: Alora, no a xe mia na bruta stimana par el sgobo o la scola, parò gavì da star chieti con chi ve sta visini, parchè a sì un fiatin nervosetti. In teoria, ghe saria anca qualchedun ca ve brama ma el problema xe ca no sì mia de l'idea de fidarve... Mi no so, nel dubio, ndè farvi un goto. 

Bilancia: Xe na bona stimana se no strafè. Nel senso, ghe xe qualchedun ca tenderia a romperve i cojoni ma voialtri sì bravi, ve ne ciavè e in tel lavoro le robe le va ala grande. Anca coi morosi le robe le va ben, ma sì pì romantici che "pratici". Ogni tanto va ben anca queo. 

Scorpione: Cusì sì ca la va ben. In tel lavoro sì grintosi e tuto queo par cui gavì lavorà el xe drio andare in porto. Anca con la fameja la va ben e se gavì progeti coi morosi xe el momento giusto par tirarli fora. Andè ben pafin in tel sport... ricordeve de mì quando ofrì el giro.

Sagittario: Ah no ciò. Me vien mae anca a scrivare: alora, par farla breve, no va ben ninte. Se portè zò e scoasse, sbaje l'umido col seco e tuto queo ca se poe sbajare. Morosi, fameja, no ghin parlemo... oh, xe mia colpa mia. Sareve in tea caneva e ocio a non volar zò dai gradini. 

Capricorno: E alora?! Sempre drio lamentarve e invese la sarà na stimana spetaco-o. Ve va tuto ben, in tel lavoro, co la fameja, coi amisi (que du, tri ca gavì) ma ocio però ai morosi, sopratuto quei veci: se na storia xe rivà al capoliea mejo scendare...

Acquario: La sarà na bea stimana sin mercore, zobia, poi l'umore no sarà mia massa bon e xe mejo se ve programè qualche svago. Ve consijo de profitare nei primi giorni dea stimana par far le robe ca dovì de lavoro e de fameja. Poi, via baraca e buratini e 'nedè su in montagna se no volì barufare.

Pesci: Cari i me pesetti, sto giro la va mia massa ben, da nesuna parte. In tel sgobo no riva le sodisfasion ca ve meritarisi anca e ghe xe un pochi massa rompicojioni in giro... Portè pasiensa fin metà stimana, poi le robe xe giusta e almancpo ve rilasè. Un consijio: ste distante da avocati e comericialisti.