Oroscopo vicentino dal 5 all'11 setembre

Ariete: A barufè con tuti, sopratuto con quei ca ve xe pì visini, tipo i veci e i morosi... Ste chieti e, se proprio dovì, andè a sfogarve fora. Ghe xe qualchedun ca no vede l'ora de star un pocheto con voialtri. Ocio ale spese però: a sì un fiatin masa "generosi"...

Toro: Va ben, disemo ca se vardemo solo al lavoro, a xe na stimana beissima. Pal resto xe mejo se ve ritirè da qualche parte, mi sugeriso sempre na caneva... In familia ve pestè i pie e anca coi coleghi la va mia massa ben. Deme reta: fasive i cassi vostri

Gemelli: La xe proprio na bona stimana (de novo...). Sopratutto coi morosi a sì dolci e romantici ca fasì venire el diabete e in tel sgobo sì cusì energici ca fasì fastidio. Ben. 

Cancro: Se ste fora de casa va tuto ben. Coi vostri a barufè ca xe un piacere ma fora tuti ve ama e ve segue. I morosi, i amici, parfin nove conosense e conquiste... nisun ve resiste. In tel weekend feve na scarpinada... No so parchè, cusì dise le stele. 

Leone: Col lavoro e lo studio va tuto ben, ca mejo no xe poe. Non solo, anca coi amici a sì al centro de l'atension e fasì parfino conquiste. Se gavì morosi, ocio... ca ve tende, anca parchè ghe tien ad avereve tuti par luri quando ca sì focosi. L'unica roba xe ca le stele ve sugerise de fare sport: mi sugeriso sempre el solevamento biciere.

Vergine: Voialtri andè driti par la vostra strada: chi ve ferma? Ovvio ca atirè le atension anca de qualche invidiosetto ca xe drio rosegare ma, deme reta, ciavevene. Tuti ve voe ben e ve apressa, in particolare i capi, ca xe quei ca da i aumenti! Ca dirve... Cin!

Bilancia: Xe mia el momento giusto par tore decision importanti. Scolteme, deve tempo, anca parchè ghe xe na s-ciantinea de sfiga atorno. Ste chieti e... bevive un spriss.

Scorpione: A sì pieni de fassino e xe el momento giusto par le publiche relassioni, sia in tel sgobo che in tel tempo libero. Se sì fidansà godive i morosi, se sì single xe el momento giusto par catarse qualchedun, ca xe la volta bona.

Sagittario: In alto i bicieri, digo sempre mi, qualche dun altro dise i cuori, ma pasiensa. Xe un periodo bon e gavì la grinta suficiente par farve valere in tel sgobo. In casa ghe xe serenità e xe importante. 

Capricorno: Sta stimana xe un fiatin incasinà. Nel senso: se el vostro raporto de copia xe un fiatin bolso, fursi xe el momento de vardarse intorno. Il problema xe ca le stele ve voe asociali. E quindi? Cosa femo? Ninte, nemo farse un drink

Acquario: Le robe in te lavoro, sopratuto in tel comercio le va ben ma ocio ale persone ca ve sta intorno. Qualchedun xe drio provare a ciavarve, e no in tel leto... A queo ghe pensa i morosi, parchè a sì particolarmente fassinosi in sto periodo.

Pesci: Ah benon! La stimana la xe da squali, sia in tel sgobo ca in te a camera da leto, dove ca podì fare l'atività fisica ca ve consijia le stee. I pì birichini podaria zercar svago anca fora de casa...