rotate-mobile
Cronaca

Oroscopo vicentino dal 18 al 24 luglio

Xe sta serate limpide e perfette par vardare le stee ma lo strologo ga dito ca xera massa impegnà in giro a feste... eco cosa chel ga tirà fora, se ve fidè

Ariete: Ocio ae spese! Par 'ndar do giorni a Jesolo (forse) no ve serve mia 12 costumi da bagno e gnanca na confesion fameja de crema. Non solo a sì impulsivi col portafojo, ca xe grave, ma anca co a lingua. Deme reta, "prima de parlare... tasì". Pal resto, se ste tenti, podarisi veramente divertirve in tel weekend, sempre ca no sì rimasti al verde!

Toro: No podì lamentarve, se gavì bisogno de star n'atimo tranquii, le stee ve da rason. Disigheo al capo, gavì da' el massimo in sti giorni e ve meritè de divertirve anca voilatri. Ma se gavì proprio da far gli sboroni, ndè vanti coa procesion: i risultati i continua a rivare

Gemelli: Anca se gavì el bracin corto, come sempre, i amici i xe abituà e vol ben par queo ca sì: lo sa ben ca sensa voialtri no ghe xe party, anca se ghe toca fare un muto par pagarve da bevare. La xe na stimana bona sia pal sgobo che par l'ammor, ma podaria rivare qualche bruta notisia...

Cancro: Ghe xe qualcun ca ve stressa e podaria eser queo dee tase o qualche dun che ve ga prestà schei e li rivoe indrio. Ste chieti e, se no i gavì, schivè el solito bar. Le stee dise ca sarà un bon periodo par el lavoro: serchè de tirar su qualche scheo (sensa rapinar veciete!)

Leone: Stimana cusì cusì ma gavì grinta da vendare, tanto per cambiare, e vea cavarè. Segneve, però, i nomi de chi ve farà i dispeti (e ghin sarà)  in sta stimana: in tel weekend podarì prendere la vostra vendetta ma, ve sugeriso mì, mejo se fasì i nobili: ofrighe un gioso a sti petachini, Magari ve li cavè de torno...

Vergine: Scùp: sto giro dovè dedicarve ai sentimenti. Metì da pare la vostra indoe da maestrine Rottermaier e tirè fora quel baby doll rosso (o i boxer a cuoricini) ca gavì meso da parte par le grandi ocasion. Ciapeve anche qualche giorno de ferie... se no ghe ciapè drento desso... mi no so quando.

Bilancia: Consijo dea stimana: ste coe reciete base, sia al sgobo che in fameja, se no sto giro le ciapè a anca a ragione. gavì un po' de sfiga e, se ve metì a discutare, gavarì torto, sempre. Mejo assar stare. Un consiglio: sareve su e tignì un po' de bianco in tel frigo, poi impisè la tv. Se no ghe xe el Vicensa in ritiro...

Scorpione: Va tuto ben se si... all'estero. No xe mia na batuda, le stee dise ca el vostro mejo lo dasì se sì fora dai cojoni, quindi, fasilo. Se no podì, metivea via: ghe xe le soite robe ca ve rompe e, pal momento, l'unica solusion xe de soportare. Fiatin mejo in tel weekend, i sarà i mojito...

Sagittario: A sì strachi ciò, xe caldo e le fadighe de l'ultimo periodo xe lì ca se fa sentire tutte e pure de pì. Cosa dirve, portè pasiensa. Zerchè de star chieti, de no far massa discussion e spetè el fine stimana: lì sì ca fasì sc-iantisi.

Capricorno: Se gavì da far robe, profitè dell'inisio stimana. Co a sfiga dei ultimi tempi, mejo ciaparghe drento quando ca e stee e xe magnanime... pal resto el solito de sto mese. Portè pasiensa. 

Acquario: Dovì partir par le ferie e no gavì ancora controlà se il peso de la valigia va ben par le regole de ryanair? Ste chieti, ca va tuto ben. Le stee, va ben ca xera cadenti..., ve incoraja a far i bagagli e 'ndar via. Sarà ca gavì roto i cojoni a tuti, ma mejo anca par voialtri sa 'ndè a fare un pocheto de vacanse.

Pesci: Disastro. In tel sgobo e coi morosi va tuto mae. El me consijo, visto ca xe anca istà e qua se more, xe de ciapar sù do calsiti e 4 mudande e cavarse fora pa un poco. Anca Sotomarina va ben, ma girè i tachi e stè là pa un poco. Xe mejo. 

In Evidenza

Potrebbe interessarti

Oroscopo vicentino dal 18 al 24 luglio

VicenzaToday è in caricamento