Oroscopo de Aluin: come vignerghine fora dal 26 al 1 novembre
Lo strologo se gaveva particolarmente impegnà par l'oroscopo de sta stimana parchè el uichend xe aluin e lù ghe tien a far bea figura coe streghe e i fantasmi. El problema xe sta ca dopo el jera talmente straco che ga dormio tuto luni... In ritardo, ma desso lo ga portà
Ariete: La stimana la va bastansa ben e dovaria anca rivar schei ma le robe pii bee xe previste par el fine stimana, quando a farì le ore picoe con chi savì voialtri... Ocio ca xe aluin e magari i morosi oi xe trasforma in vampiri. Travestimento sugerio: Dylan Dog
Toro: A sarì un fiatin nervosetti ma sta roba no ve impedirà de far boni afari e guadagnar schei ca mae no i fa. Verso el fine stimana ve pasa la buriana e a sarì simpatici e parfin seducenti. Travestimento sugerio: Freddie Krueger
Gemelli: Ahmarriasanta, sto giro va ben ninte, ma proprio ninte, gnanca a vardar ben. In tel lavoro gavì rogne e rognette con chiunque e anca la salude la va mia massa ben. Mejo sa ve sarè drento e vegnì fora solo par aluin, cusì nesun ve fa caso. Travestimento sugerio: Jason (queo de Venare 13)
Cancro: Sta stimana ve piasaria saltare i fosi par lungo e lo farì anca ma ocio a no spacarve su qualche oso, anca parchè la fortuna xe mia massa dala vostra parte. Soprtatuto in tel lavoro gavarì bone sodisfasion. Travestimento sugerio: Dracula
Leone: Ve va tuto bastansa ben ma ocio ai invidiosi ca xe sempre drio farse i cassi vostri par poi sputanarve in giro. No ste coparli, anca se ghe ndarì visin, parchè poi sarà un fine stimana beissimo. Travestimento sugerio: Charles Manson
Vergine: Sta stimana gavarì dele bee sodisfasion, oviamente al sgobo dove ca si sempre precisini e puntuai. Al capo ghe piase e forse podaria rivare qualche scheo de pì. La Luna ve fa un fiatin girar le bae ma el fine stimana podarì divertirve Travestimento sugerio: Fantasma formaggino
Bilancia: Mejo starve distante sta stimana parchè veramente a gavì un demonio par cavejo... vardè che aluin xe sabo, no ogni giorno! Ve sugeriso de morderve la lingua e de goderve la vostra nova conquista, ca xe mejo ca barufare. Travestimento sugerio: Regina cativa de Biancaneve
Scorpione: Molto ben in tel sgobo, podarisi avere finalmente bee sodisfasion. Son contento parchè ve lo meritè. A sarà anca na stimana serena e ve sugeriso de ciaparghe dentro par qualche riflesion ca gavì rimandà parchè ghe giera massa casin. Travestimento sugerio: Zio Fester
Sagittario: A sarì nervosi e spacamaroni ca metà basta. Ve convien star chieti se no volì ca el mondo intiero ve manda in ciupese. In tei primi giorni dela stimana coi morosi la va ben, poi distastro. ve convien pasar aluin a vardar la tv: Travestimento sugerio: Hannibal Lecter
Capricorno: Ste tenti ca in sti giorni podarisi perdere el vostro ben noto aplomb e dar de mato. Se sì boni de controlarve, la stimana la va vanti anca bastansa ben, anca pai progeti a lungo termine. In fameja ghe xe un fiatin de buriana ma dopo zobia va tuto in bola. Travestimento sugerio: Samara (quea de The ring)
Acquario: El Soe la ga co voaltri sto giro e ve convien star chieti, se no ve ciapè un insolasion ca, ad aluin, xe mia tanto normae. Coi schei la va ben, dovarisi avere qualche sodisfasion ma no ste sputanar tuto al bar. Travestimento sugerio: Nosferatu
Pesci: Sarà na stimana particolarmente bona al sgobo e gavarì qualche bea sodisfasion coi capi. Se sì gente creativa, xe el momento de tirar fora le idee: stavolto no i ve vardarà mia come un mato patoco. Travestimento sugerio: Jocker (queo de Batman)
