rotate-mobile
Cronaca

Oroscopo: come vignerghine fora dal 5 all'11 otobre

Co' sto frescehetto se sta ben in leto o davanti a un camin aceso, col rosto che gira. El strologo non se gha fato mancare ninte, inclusi el vin e la graspa, ma ala fine xe sta bon de vardar le stee e scriver zò cosa che le dise

Ariete: No gavì mia na bea stimana. Tenatar de dirve qualcosa xe come parlar coi muri e la zente xe drio stancarse e ocio ca no i ve buta fora de casa. De bon ghe xe che, a metà stimana, tirè fora el vostro fiuto pai affari e riverà qualche scheo. I pì birichini in tel weekend podaria far s-ciantisi co na nova conquista...

Toro: Anca voialtri sfoderè el vostro caraterin sta stimana e quindi xe mejo starve distante. A sì anca presuntuosi ca metà bastaria e la roba no fa ben in fameja. Deve na calmada e vedarì ca la seconda parte del stimana 'ndarà un fiatin mejo. Le stee dise ca, se la vostra relasion non la xe mia drio andar masa ben, xe ora de vardarse intorno. Ma disigheo ai morosi prima de lanciarve...

Gemelli: A sì bei ca metà basta e questo ve da na man anca in tel sgobo: sarà na stimana de sodisfasion, ma solo fora. In casa le robe le va mia ben e anca coi morosi sì simpatici come un brufolo in tel naso quando ca dovì usire. Ste boni e spetà domenega: xe prevede robe beissime

Cancro: Ah benon. Disemo ca podarisi contentarve de la bela situasion con morosi, conquiste e anca in fameja, parchè le finanse va mia massa ben. Del resto non podì mia essere fortunà in amore e anca al zugo. Par el weekend no se prevede niente de speciae: organiseve par el relax, ca fa sempre ben.

Leone: La sarà na stimana intensa par quei ca ghe piase far conquiste. Gavì un fassino iresistibile e gavì anca la complicità dei amici ca ve porta a caccia. Quei fidansà, però, i ga da star chieti e dedicarese ai morosi: anca par de lì la va benissimo. Le stee ve sugerise de curare n'atimin el look se gavì ancora el paltò de 20 anni fa...

Vergine: Wow, anca se par voialtri xe strano, sta stimana a sì al top par ammore e sedusion. Sì, sì, gavì leto giusto: sedusion. Quindi, via quei ociaetti da secion e sù le mudande de la festa! Altra roba xe ca non podì programare sempre tuto ma ste chieti ca le stee xe daa vostra parte

Bilancia: Sto giro podì controlare el conto corente in serenità: le finanse le va ben, gavì rapinà na baca par caso? A parte l'inissio de la stimana, la va ben anca coi incontri amorosi, del resto i schei mae no fa! Ste sereni, ca no ve mancarà ninte e l'umore sarà beissimo...

Scorpione: Sto giro podì mia lamentarve. Sia in tel sgobo ca coi morosi fasì s-ciantisi e, se sì single, la gente ve casca ai pie, e no parchè gavì l'alito cativo! A metà stimana podarisi avere n'atimo de down ma in tel weekend ghe sarà un saco de bee robe, come gite e feste. Cin!

Sagittario: Ahi, ocio ai morosi: podaria saltar fora qualche bugia in sti giorni, i vostri sospetti i vien confermà. La roba però no a ve ferma mia tra i lensoi, ogni tanto un po' di pepe fa anca ben... El fine stimana ve convien partir pa un rifugio, da soi però: barufarè anca coi sassi. 

Capricorno: El sgobo xe sempre la roba pì importante par voialtri e questa la sarà na stimana ok. I primi giorni dela stimana, però, no i xe mia boni par la coppia: baruffe furibonde in vista, anca par ninte. Stasì chieti, se podì, parchè el fine stimana el sarà tranquio e podarisi goderve el relax. No desmentegheve na bossa de quel bon.

Acquario: Ah marrria santa, mejo se ve fasì un giro a Monte Berico subito e ocio a no inciamparve. Disemo ca no xe proprio la vostra stimana e le sfighe le sa benissimo dove andare: da voialtri. Mejo ca stasì chieti parchè ogni paroa ca disì o xe na cassada o xe na baruffa. Tignì duro, ca nel weekend la va mejo. 

Pesci: La stimana la inissia ben e la finisse maissimo se no ste tenti a quel ca disì e con chi. Se ve metì a discutere anca col postin no rivè da nesuna parte. Valutè ben i obietivi ca gavì e agì de conseguensa. Se no ficheve in leto e alseve venare sera. 

In Evidenza

Potrebbe interessarti

Oroscopo: come vignerghine fora dal 5 all'11 otobre

VicenzaToday è in caricamento