Oroscopo: come vignerghine fora dal 4 al 10 majo

Ariete: A sì un fiatin confusi e no xe mia par gli stravissi de sabo. Voialtri a sì sempre in cerca de emossioni ma, come sempre, sì frivoli e il ris-cio xe ca ve trovè col bicere vodo e tanta sen. Stueve zò e zobia e venare mordive la lingua, ca fasì casin par ninte. 

Toro: A forsa de cornade, el periodo bon xe drio rivare anca par voialtri. In tel lavoro ve va ben e, con la musina piena, anca l'amor va mejo. Se gavì da rimediar a qualche cassada, xe el momento bon.

Gemelli: Sta stimana par voialtri sarà peso de Biutiful. Ocio ale barufe coi morosi, parchè poi ve manda in mona. De bon ghe ze ca in tel uikend podarisi incontrar qualche figon... Fasì voialtri, ma dopo no ste venir lamentarve se l'ex ve brusa la casa.

Cancro: No ghe semo, a sì un ris-cio par voialtri e par chi ve sta visin. Cativi, irascibili come Sgarbi, xe mejo se ste casa, sopratuto nel uikend. Mejo ca ve fe sù e zò le scalete de Monte Berico, così meditè sul da farse.

Leone: De riffe o de raffe, a voilatri ve va sempre ben. Caschè sempre in pie e, se no, ve tirè un pisolo prima de tirarve sù. Ben anca l'ammore, quindi no desmentegheve de comprarve el deodorante.

Vergine: Un po' de pasiensa, l'istà sarà un bon periodo, desso però no. Ve consijo de star pì chieti e magari venare andè fora: qualche imbriago podaria anca inamorarse de voialtri. Ste sobri: ca non ve portè casa qualche rospo.

Bilancia: Dopo i barufoni ca gavì tirà su la stimana scorsa, finalmente a sarè pì chieti e, quindi, le robe ve va decisamente ben. Un consiglio: se sì agità, lasse stare el campari. Mejo un roso bon. 

Scorpione: Ma cosa gavio ca si sempre rabià?! Dai, no, ca le robe le xe drio girar ben! Se gavì qualche problema de schei, no ste preocuparve: li gavemo tuti...

Sagittario: Bon, carichè la faretra e andè. Se volì ciapar sù e cercar robe nove, xe il momento. Ocio però a non far le robe masa in pressia, ca non ve trovè a vender giasso ai pinguini. Dopo na raffica de do de picche, forse riusì anca a intortar qualchedun.

Capricorno: Tuto in tea norma. Dopo el barlume de romanticismo dela stimana scorsa, tornè i musoni sgoboni de sempre. Quindi al lavoro ve va ben. Ocio però: ogni tanto scoltare i consigli xe mia sbajà. 

Acquario: A dovì smeterla de zugar sul Milan, se no dopo no podì lamentarve ca sì sensa schei. Ve la zerchè. Pal resto, gavì qualchedun ca ve paga da bere, quindi poco mae. Sereni, a sì sereni (i rossoneri un po' manco). 

Pesci: A forsa de star in te l'acqua, ve se ga in umido el cerveo. Vardè ca se no ve de na mossa, le robe no le va mia vanti da sole, sia in tel sgobo che in te la coppia. Sa sì in crisi, basta mutismi: ciareve.