Oroscopo: come vignerghine fora dal 30 marso al 5 aprie
Xe rivà la stimana de Pasqua e il 'stologo xe indeciso con chi pasarla, nel dubio xe gà scolà el botijon de mirto che ghe gaveva portà so zio. Ocio che poi le stele le vedeva dopie
Ariete: I corni li gavì e grosi anca ma non xe sempre necesario tirar sò i murì coa testa, poi ve fa mae. Ste chieti, verseve un goto de roso intenso e cominsiè a valutar ben quali che xe le robe da fare: xe il momento giusto par decidere.
Toro: Se di solito gavì el fascino de no spritz sbasio, sta stimana cucchè come Maurizio Rossi ai tempi d'oro. Segneve in tel calendario mercore, zobia e venare. Se non ve vien l'influesa xe i giorni boni. Me racomando, parò: consegnè el portafojo ala mama, se no ve lo trovè vodo.
Gemelli: Prosegue el periodo bon e se mejo eserve amici: uscì che tuti ve ofrirà da bevare. Nel uikend ocio ale coronarie: emossioni forti in vista.
Cancro: Dopo el periodo napalm e mine antiuomo, a sì finalmente drio darve na calmada. Se no gavì sterminà famieia, morosi, e amici, saria anca ora de trovar un posto comodo e goderse la Pasqua in pace. Va ben anca el bancon de un bar.
Leone: Sempre a caccia de prede, quando xe ca ve metì a dieta? Le stee dise che sì i re della jungla lavorativa ma gavì da sbaterve un poco par conquistar chi ve piase, ma a voialtri va ben cussì.
Vergine: Se no ve sì copà in tee prime do' stimane, deso podì tirar n'atimo el fià ma metive via ca ve va tuto ben: no xe el vostro anno, portè pasiensa. No se poe aver tuto: mejo contentarse de na grappa onesta che sperar ca rivi el cognac pregià e restar col bicer vodo.
Bilancia: Scusè el tristo zugo de paroe, ma sì proprio sbilancià. No savì do trarve e ve par sempre de cascar mae. Anca coi morosi va no ben, forse xe il caso de valutar ben. Ricordeve: el bancon xe sempre saldo, tacheve par de lì.
Scorpione: Gavì na caneva? Sareve dentro e vignì fora solo quando ve xe pasà la buriana, parchè sì pericolosi. No va mia ben sfogarse sui altri, ca no c'entra ninte. Nemo, n'atimo de riflesiòn xe queo che ghe voe.
Sagittario: A podì star contenti, la luce dee stee ve ilumina come lo studio de Diretta Biancorossa. L'inisio dea stimana concentreve in tel lavoro, poi sfurtè il momento par cucar come mai ghe ve xe suceso.
Capricorno: No ste ciaparvea co' mi: gavarì tirà zò massa santi o sarì sfigà e basta, fatostà ca questa no xe la stimana par voialtri. Sugerimento: fasì qualche bea caminada in tei coli. Ve fa ben e ghe xe sempre qualche bea osteria verta.
Acquario: La vispa Teresa la xe sepolta da quel dì: deve na svejada, ca non se poe sempre comportarse come se no ghe fusse impegni e rogne. Se no sembrè come quele done de na certa ca le va in girò consà da teen ager: fasì vigner el late in tei zenoci.
Pesci: Gavì lo charne de na scatoleta de tonno scadù. No va ben ninte e i morosi xe drio nodare al largo. Calma e gesso: spetè ca passa el periodo sfigà.
