Oroscopo, come vignerghine fora dal 25 al 31 jenaro

Ariete: A sì un fiatin nervosetti e na persona ca continua a darve sù in tel sgobo no l'aiuta. Zerchè de no coparla, pitosto evitela e andè in cerca de qualchedun ca ve capissa e ve stima. Ocio al weekend, che l'andarà anca peso Cibo: minestrina

Toro: La sarà na bona stimana, andasì d'acordo con tuti e no ghe xe baruffe in vista nè al sgobo e gnaca coi amici, fameja e morosi. Xe el momento giusto par fare publiche relasion, anca parchè tra i linsoi a farè s-ciantisi Cibo: tramesini

Gemelli: Xe el momento de fare chiarezza, in casa e coi morosi. Se volì ca le robe le vada ben, sto giro dovè metervi de impegno. In tel sgobo la va bastansa ben ma ghe ze qualchedun ca vol farve girar le bae: girè i tacchi Cibo: riso in bianco

Cancro: A gavì un saco de idee par far schei ma no ve ne va drita una... portè pasiensa, no xe el momento. El sarà un fine stimana all'insegna dele liti, sopratuto coi morosi. Mejo darve par malà e stasì par voialtri, se n fasì dani Cibo: verze lesse

Leone Ste tenti ala vostra salute! Mejo se ralentè un pocheto i ritmi e ve riposè de pì ca le vacanse le xe lontane. Pal resto va tuto abastansa ben, sia in tel sgobo che con la fameja e i morosi, e el dialogo xe tranquio Cibo: stasì legeri

Vergine: Ricordeve che "...el mona sa tuto". Se no sì sicuri dele robe, xe sempre mejo tasere, così no ris-ciè de far figure poco bee. Fasì el vostro, ca in queo sì sempre bravetti. Se sì single, podaria eserghe novità al'orisonte Cibo: Panin coa spressa

Bilancia: Alora, disemo ca le publiche relasion, con tuti, xe un disastro. Mejo se ve dedichè anima e corpo in tel sgobo, parchè podaria eserghe qualche bea sodisfasion. In tel weekend, uscì e ve divertirè. Cibo: gnochi coi broccoli

Scorpione: Finalmente a sarì boni de risolver quela dificile question al lavoro ca ve dava el mal de stomego e le stee prevede anca viagi. Ocio a chi ve sta intorno: qualchedun no ga ninte de mejo da fare ca romperve le bae Cibo: Fritata coa sevoa

Sagittario: Xe el momento guisto par fare un bel passo avanti in tel sgobo e in tel studio. Anca le publiche relassion le va ben, anca parchè si sexy ca metà basta: aprofiteghine par farve ofrire da bere, parchè le finanse le pianse un fiatin. Cibo: poenta e sarde

Capricorno: dopo n'istà e un autuno disastrosi, desso no pedè mia lamentarve. Le robe le continua andare ala grandissima e podaria andare in porto na roba ca la xera drio andar par le lunghe. Coi morosi sì già in pieno San Valentino e pai single... grandi novità! CIN Cibo: caviale e champagne

Acquario: Le robe le scominsia ad andar ben, sia in tel sgobo che coi vostri cari. Finalmente podarì cavarve via quel grugno e far qualche soriseto, ca sì così carini. Ocio a no strafare  e zerchè de trovare momenti de relax. Male, malissimo l'amor.... Cibo: zupa de fajioi

Pesci: A ve sì da da fare e i risultati i xe drio rivare ma no ste pretender massa, gavì anca na certa. Fasì le vostre robe ma sensa esagerare. Ste tenti parchè le stee vede ca gavì atorno qualchedun ca no ve voe massa ben Cibo: radicio e sopresa