Oroscopo: come vignerghine fora dal 24 al 31 majo
Tra Giro e finale del campionato, lo strologo xe sta ciapà da massa festegiamenti e ga dovudo detarne tuto par telefono, da quanto ca l'era rintronà e lo ga fato mentre el gera in curva coi reggiani...
Ariete: Deve na lucidada ai corni che xe ora. A sì pronti par nove sfide ma dovì darve na smossa, quindi... zò dala branda (ma ocio al gradin)
Toro: A sì drio perdare qualche colpo e sta stimana podarisi anca far qualche bruta figura galante. Lassè perdare: st'istà tornarè in forma ma par desso mejo ca ve sentè so a bevare un goto
Gemelli: Ghe xe i ultimi s-ciopi del bel periodo ca gavì vudo, quindi deve na mossa a tor qualche decision importante. Da agosto a sarì pì imbatonii de mi dopo do giorni de festòn.
Cancro: A sì in forma come na strassa. Gavì tirà la careta fin desso e no sì mia el pendolin Laverone. Par de pì desso a sì anca sensibili (sì, sì, gavi leto ben) e ve metì piansere anca vardando le prevision del tempo. Metive in leto e alseve tra na stimana, ca xe mejo.
Leone: In effetti ciapare do euro l'ora no xe mia na bela roba. Desso basta far i timidi e i pigri e deve na mossa. Xe un periodo bon par trovare qualcosa de mejo, se no anca star casa, a sto punto, xe mia sbajà.
Vergine: Ve speta na stimana cusì cusì ma no ste preocuparve che da metà giugno riva el periodo vostro. Ste sereni e andrà tuto ben.
Bilancia: Se volì rivolusionar la vostra vita, xe il momento giusto. Se sì biondi feve mori, se ve piase l'Aperol pasè al Campari ma, me racomando, biancorossi sempre.
Scorpione: Aaaah, finalmente podarì tojerve qualche saseto dae scarpe. Libereve da ciò che ve angustia, basta ca no copè qualdun, e 'ndè vanti co le vostre robe. Ve digo ca sarà na bea istà.
Sagittario: Le acque chete le distruse i ponti. Voialtri sì un po' cusita: boni, boni rivè sempre dove ca volì. Vanti cusì, ca la procesion se ingruma.
Capricorno: Scùp dela stimana, anca voialtri gavì un cuore. Spetè l'istà par far s-ciantisi ma zà desso scominsiè a viver un bel periodo. Ocio al zobia e al venare, ca sarì nervosetti, ma magari xe colpa dei play off...
Acquario: Gavì n'atimo esagerà co lo sciopping e desso sì drio pentirve, anca parchè no xe ca se comprè un vestio de do taje pì picolo poi diventè magri. N'atimo de pasiensa e basta coi tramesini.
Pesci: Xe na stimana un po' balenga, ma voialtri sarì in grado de far filar tuto lissio fin domenega quando sarì voialtri a pescar ben. Tegnive in forma.