Oroscopo: come vignerghine fora a San Valentino
Single o fidansà, come ogni anno xe rivà San Valentino, ca ve piasa o meno. Quei imorosà i xe preocupà de spender schei e no i sa mai dove ndare, quei soli i xe contenti de risparmiare ma se sente tristi... Ste sù! Eco cosa ve sugerise el strologo
Ariete: Ve lo digo subito, se un po' un casin. Chi che va d'acordo coi morosi, i sarà tuti pieni de cuoricini, quei che i baruffa, i ris-cia de darghe un tajo definitivo (in senso metaforico, ocio...). I single, i resta single. Sabo de sera vardeve Juventus Napoli o Sanremo.
Toro: Nol sarà mai un gran San Valentino. Xe sta un periodo difissie, pien de tension e litigi e no xe che na scatoa de ciocolatini o un par de calseti novi risolverà le robe. Mejo se ve dè malà quea sera.
Gemelli: Non ghe vignarè fora. Se sì immorosà, no gavì idea de cosa regalare e sì anca un fiatin nervosetti e ipocondriaci. Se xe vero amore, el partner capirà, se no, chel vada in ciupese. I single xe mejo ca no i vaga a cacia de conquiste...
Cancro: Dovì eser un pochin pì pasienti coi morosi e, magari, zerchè de renderli contenti, anca se no ghi gavì voja. Gavì una relasion salda e tuto se poe superare. Quei ca no la gà... no la trovarà certo in sti giorni. Fasì altro.
Leone: A sì un fiatin egoisti e gavì pensà tanto (massa?) alla vostra cariera e interesi. Se ve interesa tignerve i morosi xe el momento giusto de tirar fora qualche scheo e de far un San Valentino come se deve. I single, se no i se mete in te l'ordine de idee ca el mondo nol gira mia intorno a voialtri, i resta single, ma gavarisi anche qualche chance se metì zò lo specio.
Vergine: Sì agità ca metà basta e volì ca tuto sia perfetto, anca se magari lo xe già. Ste chieti e zerchè invesse qualche modo novo e originale de star insieme coi morosi, se no i se stufa. Bon momento pa i single, ma evitè i posti da coppiette, ca no ris-ciè de far danni.
Bilancia: Nol sarà mia un bel San Valentino: a xe un fià de tempo ca la relasion no ve convinse massa ma sì drio far finta de ninte: xe inutie, le robe le va afrontà. Ben par le nove conquiste ma dovì eser sensa pensieri e no fare programmi. Sbilanceve.
Scorpione: Tolì ferie e ndè farvi na bea vacanseta romantica coi morosi. El momento xe beo, ndasì d'acordo e ve amè: sprigionè cuoricini da tuti i busi e fe vignere el sgranfo ai single. Quei ca xe in cerca... podaria trovare ma ocio ae fregature!
Sagittario: El sarà un San Valentin indimenticabie, ca ve piasa o meno. Quindi, metive in forma, comprè le mudande nove e tuto queo ca serve. Anca pai single, basta ca ve vardè intorno che l'anima gemea la xe visin!
Capricorno: No, decisamente l'ammor no xe la roba che va mejo in sto periodo. Chi che ga morosi da tanto tempo, ga da vardar le robe con sincerità e capir bene cosa ghe xe ca non va. Mejo un San Valentino sobrio... I single... i resta single, ma no ste farghine un dramma.
Acquario: Fascino come se non ghe fusse un doman. A sì fighi ca metà basta e i morosi i xe inamorà coti: sarà un San Valentino beissimo, anca pai single ca sicuramente i trovarà qualcosa de beo da fare... fin tardi ;-)
Pesci: Xe un momento de cambiamenti, ma non necesariamente in pegio. No ste fare i tacagni e festegiè San Valentino come se deve, magari trovè fora qualcosa de originae, e tuto ndarà ben. I single, se se varda intorno, podaria vedere qualcosa ca ghe jera sfugio prima...
