L'oroscopo: come vignerghine fora dal 27 aprie al 3 majo

Ariete: Se no ciapè a cornade anca el poro frutarolo a ste mia ben. Ma voialtri sì cusì e toca soportarve. Solo na roba: ve racomando de pensar n'atimo de pì ale robe, se no queo el ve tira drio na cassa de naranse. 

Toro: Ah ben ciò: par voilatri xe drio scominsiare un bel periodin. Zornate piene e con bee sodisfasion: zerchè de no ciaparve in leto, che aprie xe quasi finio e no gavì pì scusanti.

Gemelli: Ve lo gavevo dito de darve na smossa e ve o ripeto. No xe mia tempo de 'ndar par bruscandoli se gavio question verte. Sarele ca dopo l'istà el cielo no sarà mia beo. I bruscandoli dasimei pure a mi. 

Cancro: Tuti ve vol ben, amici e anca amori. Par chi xe drio scominsiar na storia nova, ste tenti ca xe la volta bona ca ve trovè incastrà ben. Pa chi preferisse ndar in volta co i amici, ris-cè na sbornia ogni sera: tuti ve ofre da bere. Ciapeghe dentro.

Leone: Dopo un periodo de fulgore, xe ora de sbasar la criniera. A sì incasà col mondo intiero e rugì ca sembrè el leon del cinema. Na roba va dita parò: sto giro gavì anca rason ma no ste sbranar nisuni, par piacere. 

Vergine: A ve va tuto così ben ca fasì quasi fastidio, quindi mejo evitare quei del Leone, ca xe sfigà e no i ga mia un bel caratere. Pal resto, wow!

Bilancia: Ghe xe qualche rognetta da risolvere, o qualchedun che gavì fato beco o che vansa schei. In ogni caso no xe mia vostri fans e xe mejo ciarir le robe. Sicome sì rassionali, anca torse un bijeto par el Mesico podaria eser la solusion giusta. 

Scorpione: Ben dai, scominsè a ingranar n'atimin. A sarì sempre barufanti ma almanco le robe dovaria, con calma e gesso, giustarse. Prepareve, ma non solo par la prova costume: dala metà del'anno a sarà el vostro momento e la vacia majetta del concerto dei AC/DC del '92 no va mia ben.

Sagittario: Stimana chieta trane par quele do, tre cartele de equitalia ca fe finta de eserve desmentegà. Mejo tirarle fora prima ca ve porta via la machina. Va ben che al bar andè a pie, però se piove la fa comodo.

Capricorno: A voialtri pol pasarve sora anca un Freccia Rossa ma ve riciapè sempre. No se mia stà un bel inissio anno ma, se no ve sì copà (cosa imposibie), desso le robe dovaria scominsiar girar ben. Sarè le ultime question verte e desmentegheve le rogne de sti mesi. Proveghe, almanco. 

Acquario: Sa sì drio spetar un lavoro, mejo ca ve metì chieti. El dovaria rivare ma prima de l'istà... Quindi, se volì farve un poche de ferie in giro, mejo desso, sperando che no piova. 

Pesci: Mejo eser el protagonista de "La sirenetta" che de Lo Squalo, no? Quindi dei, dè un colpo de coa e serchè la solusion pì giusta, ca no xe mia distante. Un po' nervosetti a metà stimana. Consiglio: zontè graspa in te l'acqua de la boccia.